ليلة في الإستعجالي ... من زاوية أخرى
ما نتفكّرش نهار آش شدّيتها الڨارد : إربعاء و إلّا خميس وإلّا جمعة فضيل
نتفكّرو نهار شتاء، أما طقسو جميل
خسارة! موش مروّحة ! عندي ڨارد في الإستعجالي، يستنّى فيّ ليل طويل
بعد الخدمة، شمّرت على ذراعي و دخلت لهاك الحفرة، اللّي يدخللها يخرج مهبول
نخدم... نخدم... نخدم... تعبت ! أما مازال اللّيل طويل
نتحرّك كيف الرّوبو ، إمشي منّا، أرجع منّا.. كلّم قسم الجراحة، قسم القلب .. لوّج على التّحليل
ملّا إستغلال، قلّو تربّص داخلي ! وينو الطبيب المسؤول ؟
مخلّيني غاطسة، و هو أكثر الوقت مشغول ؟
برشا مرضى.. فمّا اللّي صابر، عاذرك، ساكت، و فمّا اللّي يصيح فيك كيف الغول
عييت ! لا نلقى وقت باش ناكل و لا باش نصلّي على راحتي و لا نرتّح بدني النحيل
نسيت روحي بالخدمة و تعدّيت في الطويل
الأربعة متاع الصباح، باش نطيح من التعب ، نحِل في عينيّ بالسّيف... فادّة، حزينة، مدمّرة ! آش لَزْني على ها الحمل الثقيل
بعد نقول : ميسالش، نقضي شور العباد ، خدمة بكلها ثواب بإذن ربّي الجليل
قعدت نتمتم وحدي ... النّاس الكل راقدة : من العسّاس للفرملي، للطبيب المسؤول
كان صاحبتي اللي كيفي متربصة .. بنية ستيل
باش ما نقولش إلّي جسمها أكثر مني هزيل
في البيرو متاعها .. سارحة... كيف البنات الكلّ، تحلم بصاحب الظّلّ الطويل
نحنا هكّاكة ، كل واحدة شاردة في بيروها، و سمعنا صياح و تولويل
دخل علينا راجل، ضعيف و طويل
سكران، مروّح من اللّوتيل
لابس كان سروال دجين، في البرد حفيان، موش لابس حتّى مريول
و آني نغزرلو ساكتة ... نرعش من الخوف، قلبي يدق في الميل
نقول : هدا اللي ناقصني ! ملّا موقف مهول ! وين باش نفصع ؟ ما فمّا حتّى سبيل
سمّيت بسم اللّه و قلت حسبي اللّه و نعم الوكيل
مازالت كي بديت نسأل فيه: شنوّ يوجع فيك ؟ ماريتو كان ترمى في القاعة و رجع للسب و العرك و التولويل
في لحظة سْرحت ... قلت : سبحان اللّه ، على حكمتو ألف دليل !
قدّاش الشراب يخلّي العبد ذليل
ما تلومونيش كي نقول : نكره الشراب و اللّي يبيعو واللّي يشريه، و اللّي يشربو و يروّح يتدهشر عقاب اللّيل
يصيح على أولادو، يضرب مرتو، يقلّق الجيران، و يقعد حديث النّاس و القال و القيل
ربّي يتوب علينا و عليهم و ينجّينا و ينجّيهم من العذاب و الويل
عاودت غزرتلو، قلت في قلبي : صيح قد ما تحب وْخيّ ، ما عادش يؤثّر فيّ لا كلام و لا تهنتيل
مخّي مقفول، جهدي قليل .. كان ينفخ عليّ الهواء نميل
عدّيت عليه، عطيتو الدّواء و روّح .. "تعدّات سلمات" قالتها صاحبتي الستيل
رجعت قعدت في البيرو .. شادّة دموعي .. وقتاش يوفى ها اللّيل الطويل ؟!
و تشرق الشّمس و يبدا نهار آخر جميل
جميل ؟
مثبتة ؟! يا بنتي فيق ! راك راجعة طول لقسمك تخدم ! مازال الحْمِل ثقيل
آآه ! مازلت باش نتعدّى في الطويل
تاعبة ، حزينة، مدمرة .. و قلبي يوجع ! آآآه يا قلبي العليل
الڨارد= garde
الرّوبو =robot
فرملي =infirmier
ستيل = style
البيرو = bureau
الميل = mille
الرّوبو =robot
فرملي =infirmier
ستيل = style
البيرو = bureau
الميل = mille
10 commentaires:
Enregistrer un commentaire