عيدكم مبروك



السّلام عليكم و رحمة اللّه و بركاته

إن شاء اللّه عيدكم مبروك الناس الكل ...
الحمد للّه الجليل ثناؤه و الجزيل عطاؤه ...
حبيت نكتب كليمة في ها النهار الفضيل ...

رمضان السنة كان مميز جدا، و الحمد للّه
ريت حوايج ما كنتش نتخيل روحي نشوفهم في بلادنا موش خاطر موش متوسمة الخير في العباد، أما خاطر كنا مخنوقين و مغلوبين على أمرنا ..
ريت بنات بلادي يفرقوا ألف كتيّب للتذكير بفرصة رمضان
ريت النساء في صلاة التهجد ما رفعهمش المكان المخصص ليهم في المسجد
ريت الرجال ما لقاوش بلاصة في صلاة الفجر

ريت أولاد بلادي أسسوا جمعية خيرية باش يعاونوا العائلات المعوزة
ريت شكون تبرع بعمارة بكلها شقق للفقراء
ريت شكون عطى دارو في وسط البلاد باش تولي مدرسة لتحفيظ القرآن
ريت العباد تهز الماكلة للمسجد بلاش حساب باش تربح أجر إفطار صائم

ريت قفة رمضان تتفرق على الديار
 واليوم ريت الوفود الغفيرة من المصلين لصلاة العيد في المعب البلدي متاع المدينة
مشهد عمري ما كنت نتخيل روحي نشوفو في تونس
و
الحمد للّه إني عشت و ريتو
 ( إن شاء اللّه كيف نتحصل على صور نحطهم  )

ربّي يرحم الشهداء إلي ضحّاو بحياتهم باش خرجنا من عهد القمع و التضييق
ربّي يصبر أهلهم و يجازيهم عنا ألف خير
ربّي يبارك لكل من ساهم في ها الخير الكل

ربّي يدوم علينا ها النعمة و لا يرجعنا للي كنا فيه
ربي يحمي بلادنا و يوحد صفوفنا على اختلافنا
و يا رب أنصر إخوتنا المستضعفين إلي مازالوا يقاوموا في سوريا و ليبيا و اليمن ... و القائمة طويلة
 
يا رب لك الحمد كما ينبغي لجلال وجهك و عظيم سلطانك
اللهم أعد علينا رمضان أعواما عديدة‎
تقبل
اللّه منا و منكم
كل عام و أنتم و المسلمون في كل مكان بألف خير
و السلام عليكم و رحمة
اللّه و بركاته

صلاة العيد بالملعب البلدي

CONVERSATION

12 commentaires:

  1. ان شاء الله تزيد تعيش و ترى ما يسرك و آمين و بارك الله فيك على نغحة الأمل والخير الي بعثتها فهاليوم الفضيل

    كل عام والأمة الإسلامية بخير وربي يتوب علينا ويهدينا في رمضان وغيره

    RépondreSupprimer
  2. آمين :) يعيش أختي :)

    RépondreSupprimer
  3. صحيتك على التدوينة، هو إلي شفتو يفرهد عل القلب أما زادة أنا شفت حوايج للأسف ما تفرحش حتى طرف (السبان والشتمان و...)أنا مننكرش إلي ثما تغير بعد الثورة أما مانفرطوش في التفاؤل وإن شاء الله الخدمة الصحيحة نبداوها توا

    وكل عام وأنت بخير

    RépondreSupprimer
  4. مرحبا بيك و شكرا على التعليق، و عيدك مبروك :)
    التفاؤل متاعي مبني على واقع ريتو قدامي و الحمد لله، و موش على مجرد عواطف جياشة و أحلام وردية ،
    و أكيد محناش عايشين في عالم مثالي بكلو فراشات و عصافير تزقزق، أكيد فما ممارسات خاطئة و أكيد باش تشوف إلي يعجب و إلي ما يعجبش تحت مسمى الحرية، خاطر كل واحد و نظرتو و طريقتو في التعامل مع الوضع الجديد .كل واحد عندو قناعات،و كل واحد يرى روحو هو الصحيح، و كل واحد يعبر و يدافع على مواقفو و أفكارو بطريقتو ، ساعات يكون بأسلوب حضاري و مسؤول و ساعات يتعوج و يولي يهز و ينفض :/
    و التطرف (إذا كان هذا الي حبيت تلمحلو ) موجود سواء كان ديني أو فكري ،( و بالمناسبة نهنيك على مقالك الممتاز على الإرهاب الفكري )، و تعمدت نحط رابط فيه مقطع من خطبة العيد، يدعو فيها الإمام إلى التسامح ، ما نعرفش كان سمعتها ...
    ... أما موش هذا الموضوع متاع التدوينة ؛)
    آني عبرت على فرحتي لأني أخيرا وليت نخرج من دارنا ب"اللباس الطائفي" من غير ما نخاف لا يتبعوني و يقولولي إيجا أعمل إلتزام، ولى خويا يمشي لصلاة الفجر ماغير ما يناديو عليه في المركز من بعد ... يمكن العباد الي ما عاشوش المشاكل هذي ما يحسوش قيمة ها الحرية: حرية القيام بالشعائر الدينية ( إلي هي أبسط الحقوق )، و هذاكا علاش ما يفهموش سر ها التفاؤل ...
    أكيد مازال الطريق طويل، أما زادة وين كنا و وين صبحنا، الحمد لله :) و ربي ينفع بينا بلادنا و يهدي الناس الكل :)
    و السلام

    RépondreSupprimer
  5. وبيك أكثر:)

    أنا(آني) نشعر بالذنب إلي كتبتك في كومونتار طويل. أما بإيجاز والله الكومونتار متاعي بريء مافيهش تلميح ولا إتهام وأهم جملة فيه هي الجملة الأخيرة :)

    السبان والشتمان مستوحى من عركات شفتها في مدينتي بين "خلايق" وما عندها حتى علاقة بالتطرف

    أنا صحيح إلي شخصيا ما عانيتش إلي إنت وأي أخت "طائفية" عاناته أما جاي من وسط محافظ عانى الأمرين من اللي تحكي فيه وهاكا علاش ربما لا تنطبق
    علي الجملة هذه
    يمكن العباد الي ما عاشوش المشاكل هذي ما يحسوش قيمة ها الحرية
    وأنا نفرحلك ولأي أخت محجبة (بصدق) وربي يدوم الحال...

    إي نعم الحمد لله :) وربي يهدي أمة محمد أجمعين
    و السلام ورحمة الله

    RépondreSupprimer
  6. لا عاد ! عيش خويا ، أما إحساس بالذنب ، باهيشي؟! بالعكس يسعدني مرورك و تفاعلك :)
    سامحني كان أسأت فهمك. و الجملة هكي ( يمكن العباد الي ما عاشوش المشاكل هذي ما يحسوش قيمة ها الحرية ) ما وجهتهاش ليك إنت ، خاطر من خلال التدوينات متاعك ، نعرف إلي إنت موكش منهم ... أما موجهة لعباد معينين موش باش نتعب روحي و نحكي عليهم ...
    بالنسبة للسبان و الشتمان ... آش باش نقلك ؟ ربي يهدي أكهو ! آني آمس ريت في الإستعجالي مرا ضربها راجلها بسكينة في وجهها ، و لاخر سكران مدموغ، على الصباح .. باش نقلك إلي مازال برشا ما يتصلح ...
    شكرا على دعواتك و ربي يفرح قلبك،
    و عليكم السلام و رحمة الله و بركاته

    RépondreSupprimer
  7. ليلى ربي يبارك فيك ويتقبل منا ومنك صالح الأعمال، عيدك مبارك. زادك الله سداداً و نوراً.

    RépondreSupprimer
  8. آمين،
    بارك اللّه فيك يا معزّ و ربّي يعزّك و يعزّ بيك هذا الدين

    RépondreSupprimer
  9. السلام عليكم ،
    عيدك مبروك ليلي وربي يتقبل من ومنكم صالح الأعمال وربي يدوم النعمة متاعو على أبناء تونس ويزيد من فضله.

    RépondreSupprimer
  10. و عليكم السلام و رحمة الله و بركاته
    مرحبا بيك وائل و بارك الله فيك، و آمين على كل دعوة دعيتها ،
    إن شاء الله كل عام و إنت و العائلة بخير و عافية

    RépondreSupprimer
  11. 3idek mabrouk w hani 3araftik menin:) jarti

    RépondreSupprimer
    Réponses
    1. و انت بالأمثل ، مازال رمضان ماجاش xD
      نتشرفو يا أختي ، تطلع من أكودة ؟ ولا حمام سوسة ؟
      مرحبا بيك و إن شاء الله نتلاقاو في الخير :)

      Supprimer

Back
to top