العين تدمع و القلب حزين
نغزر لبلادي شاعلة بين نارين
شكون تصدق ؟ اللي قال كلمتين
و بعد رجع في كلامو و قال "مجرد تخمين" ؟
ها الكلام ما تعاودش في الشارع مرة و ثنين؟
و لّا نصدقو إلي يعرف ها الدولاب عندو سنين؟
عباد تتظاهر و عباد ساكتين
حايرين ، موش عارفين وين ماشين
نتفاءلو ولا زعمة في حيط داخلين؟
عباد تتكلم تتضرب بالعصا و اليدين و الساقين
شرطة تفرق و تعذب، باقي في الغلط مكملين
بنت بلادي تتهان قدام العينين
وليد صغير يبكي كيف اللي نشوفوهم في فلسطين
اللّه ينتقم منك يا زين العابدين
23 عام ما كفاوكش إنت وللّة العين؟
باقي أتباعك على الشر ناويين؟
باقي تفتنو فينا ؟ سيبونا خليونا رايضين
يا حكومة بدل أساليبك، فدينا من الترهدين
باش تكلم الشعب تضرب عامين؟
حل الصرة تلقى خيط .. و زيّن كلامك بآيتين
تحركو و حاسبو ها الفاسدين
ولا شديتو في واحد و نسيتو الاخرين ؟
البلاد أمانة في رقبتكم, ولّا ناسيين؟
ما عندي ما نزيد، موش مستانسة نحكي بها اللهجة :/ أصلا ماعادش فاهمة حاجة كبيرة، أما فديت من الفوضى و الفتنة و العنف و تشعيل النار و استبلاه العباد و كلام المسؤولين!
بالحق قلبي حزين !
على حال بلادي و مستقبلها الماشي تحت الساقين !
البلاد أمانة في رقبتكم, ولّا ناسيين؟
ما عندي ما نزيد، موش مستانسة نحكي بها اللهجة :/ أصلا ماعادش فاهمة حاجة كبيرة، أما فديت من الفوضى و الفتنة و العنف و تشعيل النار و استبلاه العباد و كلام المسؤولين!
بالحق قلبي حزين !
على حال بلادي و مستقبلها الماشي تحت الساقين !
0 commentaires:
Enregistrer un commentaire