أحداث هذه القصة تدور في زمن كثرت فيه الفتن ... هههه .. ما لقيت ما نقول .. باش نحاول نكتب هالمقال إلي صارت أحداثو في ليلة بلا قمر ... ههه .. موش عارفة شبي يدي عاكشة هالأيامات
الخميس 6 أكتوبر 2011
الساعة 4 و 35 دقيقة
نسمع في موسيقى غريبة ... شنوة هذا ؟ ووووه ! فرزيط ! منين دخل للبيت ؟!! قمت كالمهبولة ، نلقى أمي تتسحر ، اجريلي خنفوسة ( للي ما يعرفونيش ، عندي حشراتوفوبيا ) ، جات قتلتها و رتحتني .. أما ما نجمتش نرجع نرقد .. الصبر
الساعة 6 و 30 دقيقة
في محطة القطار . يا ! هاي منى ! ( زميلة ) .. ركبنا و دخلنا نلوجو على كرسي فارغ ، ياخي ما لقيناش حتى وين نوقفوا :/ و آني جايبة معايا كتاب و أوراق و قلم رصاص و نميل في راسي …
inter-wagons ترصاتلي في
واقفة مع كمشة ولاد و طفلة تتكيف ... الصبر
تعالت الأصوات المطالبة بإسقاط النظام .. آه ؟ لا .. تي قول عليه برنامج الإتجاه المعاكس و بالطبيعة كان الموضوع : النهضة ، المرزوقي ، الموارد الطبيعية في تونس، الساحل و الجنوب .. إلخ.. و مع
ريحة الدخان ، وليت نغفق .. و زيد جاء واحد عسكري كردونة، عينيه تتشارق تقول سكران، قال شنوة مازال كي عدّا الجيش ، وقف بحذانا و بدا يتكيف و يغني : و أعرف حكايات .. مليانة آهاط ... الصبر
الساعة 8 و 39 دقيقة
وصلنا أخيرا لتونس، بعد تأخير ب 26 دقيقة فقط ، هبطت كاوُو .. نلقى الأخت مسلمة تستنا فيا ، الغريبة إلي هي ما عرفتنيش كان ما حييتها آني .. رحبت بي بكل حفاوة ، بارك الله فيها ، بنية صغرونة ( موش برشا ) متحفنة، طيبة برشا، حنون، ضحوك، و عندها رخصة سياقة ههه ..
الساعة 8 و 55 دقيقة
الأخت بريما لحقت بينا, أن مود "فلة" ، موهرة و هي بكلها طايحة في الأكحل و حويجات يلمعو بحذا اليدين .. و الغريبة إلي هي كانت تحث خطاها تجاهنا و هي موش تشوف فينا
..
بعد التسليم و " شنحوالك ؟ لاباس ؟ إنت لاباس ؟ لاباس الحمد لله .. شعاملة ؟ لاباس ..." و هاك الموروث الحضاري متاعنا .. طلعت الحكاية فيها قطار آخر ! الصبر
...
الساعة 10 يظهرلي
ثلاث أخوات ، و بلوغة التوريست الي يبققوا فينا، ثلاث راهبات ! اللطف، كلاونا بعينيهم و أحنا ندورو ، طالعين فهاك الطلعة متاع سيدي بوسعيد، و الشمس ضاربة فينا ، و في كل تركينة نلقاو جماعة البوزار و إلا الهندسة المعمارية قاعدين يصورو في الديار، صحة ليهم ما أحلاها قرايتهم ، قلو ڨارد في الإستعجالي ... .
مشينا لحافة الهضبة و إلا شنية ، نتفرجو على البورط ، ياسر مزيان المشهد و عملنا تصاور و أجواء ..
café des délices و بعد مشينا قعدنا في
ما فماش برشا عباد، جاء السرفور و قالنا : آش تطلبو ؟ هكاكة بلاش لائحة مشروبات ، تحبني نوحي شنو عندكم ؟
باهي : شنو عندكم ؟قال كل شي إلا الشاي ما جبدش عليه ( قعدت في قلبها بريما ) ، خذيت آني شكلاطة سخونة ، في ها السخانة ، و الأخوات كل وحدة عصير نوع .. و بريما كان عصيرها مزيج عجيب ، بالموز و الكرموس حسب الشكل، جاب ربي ما فيهوش كيوي :)
حكينا في برشا مواضيع : عالم التدوين، و الأصدقاء المدونين، و النهضة و المرزوقي و الحرب على الإسلام و نقمة و أخواتها .. إلخ .. و تبادلنا الهدايا، جو ! الأخت مسلمة كانت هادئة قليلة الكلام كثيرة الإبتسام والأخت بريما هادئة و كلامها موزون، الشمس عملت فيها حسيتها مش في فورمة كيما في العالم الافتراضي
و أحنا قاعدين ، جاء شاب معاق، ربي يصبرو و يجازيه كل خير على صبرو، يبيع في الورد ( بلاستيك ) عطيناه فلوس و قلنالو موش لازم الورد، ياخي أصر و قال : نخدم على روحي .. كان فعلا موقف مؤثر، خاصة و إنو كان ينطق الحروف و يتحرك بالسيف .. درس للي ماد الأربعة و ماد يدو للناس و هو أصح مني و منك ، ربي يهدي
…
الساعة 12
أحنا خارجين، و وليد تونسي مالجماعة إلي نحبهم برشا، آني متعدية و هو قال لصاحبتو اللي لاصقة فيه : الدنيا سخونة .. كان يلمح للبستنا ..
ڨحرتلو .. في قلبي .. ههه .. برا زمر، ناقصني كان إنت
...
الساعة 12 و 30 دقيقة
مشينا للمسجد باش نصليو الظهر، طلع ما فماش إمام و إلا شنية الحكاية، نستناو نستناو، في الآخر صلينا وحدنا و خرجنا
الساعة 13
في مطعم، ما فهمتش شكونو مهندس الديكور الي كبلو سعدو، بلاصة كيما سيدي بوسعيد، و يعمل ديكور هكا ؟ لا علاقة !
خذينا بيزا و الوقت الكل و آني نحكي على ذكرياتي الهايلة في قسم الجراحة و قسم التوليد، و الميزيريا الي عايشين فيها المرضى و الأطباء المتربصين
..
الساعة 14
قطار مرة أخرى ، الصبر
الساعة 14 و 45 دقيقة
ندورو في مكتبة العلم ( هكا إسمها ؟ ) ، بريما عندها ليستا متاع كتب و آني و مسلمة نقراو في العناوين ... شرات زوز كتب في الآخر و انطلقنا في اتجاه محطة برشلونة
الساعة 15 و 30 دقيقة
يوم الوداع .. الحب ضاع .. و القلب آه .. حس بضياع ... ههه .. ملا دمار شامل.. كهو ، سلمنا على بعضنا بالأحضان على أمل اللقاء في يوم ما .. و ركبت في القطار ، و مشى القطار و هوما يجريو وراه على الرصيف و طارت القبعة متاعي .. هههه .. نفلم ، موش صحيح، إلي ما عندوش تذكرة ما يعتبش المحطة !
ركبت في القطار، و يا خيبة المسعى، باقي ما فماش بلايص، بالرسمي فديت وقتها و بدات أعصابي تتشنج .. وقفت مرة أخرى في ال
inter-wagons
المحنون، نلقى زوز بنيات، وحدة بلاش حجاب و الأخرى لابسة نقاب، و آني جيت في وسطهم ما بين بين .. الزوز أصغر مني .. بداو يحكيو .. هاو الملخص متاع الحديث :
البنية الأولى : يعطيك الصحة هاك لبست النقاب .. أنا أمي منتقبة .. إنت شتعمل ؟ يا طبيبة ! صحة ليك .. أنا عندي الفدة ملي صغيرة .. خويا عمرو عشرة سنين، حفظ ستين حزب ( ما شاء الله ) و ديما الأول في القسم و يبدا يصلح في الأغلاط متاع المعلمين، و يصلي قيام ليل و عندو الفدة أما ما ياخوش دواء، و ساعات يقول حوايج باش تصير و فعلا تصير ( وقتها ما عادش عاجبني الحديث، قريب تقول : الشي لله سيدي خويا ... )
البنية الثانية عمرها 19 سنة ، تقرا باك و لابسة النقاب ، بصراحة قلت، يعطيها الصحة خاطر ماهيش ساهلة كخطوة في عمر و فترة كيف هكا ..
و بعد جبدنا نفس المعبوكة : الإنتخابات، و النهضة .. ما جبدناش على المرزوقي الحقيقة ..
الأخت المنتقبة قالت : نكره النهضة ، مانيش باش ننتخب باش ما نركبش إثم على رقبتي ..
حاولت نفسرلها إنو هكا تتسمى سلبية ( هذي نظرتي للأمور ) و كان باش ننعزلو باش نعطيو الفرصة باش يرجعو يقصيو الدين من مظاهر حياتنا، و يمكن نرجعو نعسو على الرجال في الجوامع و نمنعو الحجاب .. يسعدك هذا ؟
قاتلي : هاكا جهاد ... كلامك لوجيك، أما أنا مقتنعة ألف بالمائة ..
الحقيقة ما عجبنيش تفكيرها ، أما ما زدتش الحديث، هي حرة و كل إنسان و قناعاتو ...
مشيت دخلت في محاولة يائسة باش نلقى بلاصة، خاطرني بيّلت، ياخي فما شاب طويل القامة ، قام و خلالي بلاصتو، ربي يكثر منو الناس، و آني ما كنتش من العاكسين .. مديت الكتاب متاعي أخيرا و قعدت نقرا و نغزر للوقت باش ما تفوتنيش المحطة، بما أنو في تونس كيف تطلع في القطار، ما تعرفش على روحك وين، لا يقولولك هذي محطة و لا شي ، و كمل الشباك مخربش قدامي و الدنيا بدات تظلام و آني نحل في عيني بالسيف
الساعة 18
حاصيلو، وصلت لاباس و الحمد لله، مع تأخير بنصف ساعة فقط ! الصبر و أكهو ..
نهار تعدى تحفون، رغم التعب الجسدي، لقاء مع أخوات رائعات، ربي يباركلنا و يدوم عشرتنا في طاعتو . وصلت لإستنتاج إنو صحيح العالم الإفتراضي فيه برشا مرج، أما زادة فيه برشا عباد من مختلف الجهات و اللهجات الي فعلا يحسسوك إنك محظوظ لأنك تعرفت عليهم
..
و السلام عليكم
صحّة ليكم
RépondreSupprimerعالفازة باش نكركر جماعة حزب الفكرون المتطرّف و العيدودي بوكّشان إلى مكان قصّي خلّي نعملوا قعدة ماسونيّة على قاعدة =p
Bon houwa je m’attendais "naturellement" à une tof où on vous voit vous trois mais bon :/ (Pour booster les visites à ton blog mouch 3la 7aja :p )
RépondreSupprimerبنية صغرونة ( موش برشا ) متحفنة، طيبة برشا، حنون، ضحوك، و عندها رخصة سياقة ههه
-> Perfect! :D
الأخت بريما لحقت بينا, أن مود "فلة" ، موهرة
-> mode ghoula plutôt :/
والأخت بريما هادئة و كلامها موزون
-> :o
مشينا للمسجد باش نصليو الظهر، طلع ما فماش إمام و إلا شنية الحكاية، نستناو نستناو، في الآخر صلينا وحدنا و خرجنا
-> si c'est celui d'en bas, ysalliwah mwa5ar, juste avant el 3asr il me semble
Un très joli style sinon :) (on dirait que t'as repris des couleurs :o)
wa3alaykom assalem :p
يعيشك أخ تاتاشي :)
RépondreSupprimerإيش بيه، فكرة ، كركرهم و أعملنا في المدونة متاعك compte rendu ;)
@karawen :
RépondreSupprimerشكرا أخ كروان على النصيحة :P
أما السماح ! الي موجود يكفي :))
أيه ، ما شاء الله عليهم الزوز *-* كيما وصفتهم، راهو حاولت نكون موضوعية قدر الإمكان، و زيد فعلا ما نعرفش "نمدح" .. معناها مع هذا الكل يمكن نكون قصرت في حقهم ؛)
بالنسبة للمسجد، ريت واحد بركة، إسمو "مسجد الغفران" يظهرلي .. يمكن كيف ما قلت ، يصليو في الآخر، في بالي تنحاو هالعادات في تونس :/
حاصيلو، شكرا جزيلا :) و عمرا طويلا و كل عام و أنتم بخير :p
و عليكم السلام و الرحمة :)
السلام عليكم :))
RépondreSupprimerأول حاجة يعطيك الصحة إنت وميمان على الزيارة و على كل شي ;)
ثاني حاجة يعطيك الصحة على التدوينة قريتها مرتين, كيف قريت الجملة إلي تابعتني قلت تمشيش تكمل الباقي متاعها هههه
شنوا نقول؟ الكلام هرب كالعادة:D
ربي يفضلكم حبيباتي و ربي يجمعني بيكم(ن) في أعلى جنات النعيم إن شاء الله
PS1:ليلتها بايتة نحلم بيكم ههههه
PS2: نطلعشي بالحق تلهيت نعس على صبات يلمع هذاكة علاش ما عرفتكش :فيفي:
PS3: :D طلعتو إسم على مسمى لؤلؤة و فلة
نحس في روحي محظوظة:')
..الحمد لله
السلام عليكم:*:*
و عليكم السلام و رحمة الله و بركاته :)
RépondreSupprimerنورتنا أختي مسلمة ! هالخطى السعيد :))
يعطيك الصحة إنت زادة على تنقلك و وسع بالك و انتظارك :)
ماغير ما توصي، ما نعاودش كل شي .. هههه ...
ربي يباركلك يا أختي هذا من حسن أخلاقك و إن شاء الله نكونو عند حسن الظن :)
و آمين على الدعوة الرائعة ، جازاك الله خيرا ، و السلام عليكم
لا شيّ الجماعة نعرفوا بعضنا عنّا سنوات و نعملوا قهوة بمعدّل مرّة في الشهرين
RépondreSupprimerو باش ما تقعدش في قلبك الفازة هاو ملخّص صغرون
مشيت لكاتدرائيّة القدّيس فانسون دي بول نلقى آركول و ليوماروس و مانز و العيدودي بوكشّان
السلام عليكم آشنو أحوالكم لاباس؟
عملولي ملاحظة على اللّحية رجّعتلهم نفس الملاحظة
قدّمنا باش نمشيوا للقهوة اقترحت القهوة المتركنة بحذى الدّاخليّة
مشينا ما لقيناش بلاصة رجعنا بحذى نزل أفريكا لقينا طواول فارغة قعدنا
بديت نبّر على الجماعة على خاطر يشجّعوا المؤتمر من أجل الجمهوريّة
بعدها بدا نقاش حول التطرّف في المجتمع و الدغمائيّة و دور كلّ انسان عقلاني في تهدئة الخواطر لتفادي اشعال نار الفتنة
خلط علينا فلاّق حكينا شويّة على الآندروييد و الآبل
بعدها بدينا نحكيوا على الدّين و دور الامام في تأطير المسلمين و دفعهم نحو خلق أفضل في المعاملات
و كيفاش فمّة برشة ناس وين يتوفّالهم شخص يعانيوا من تطفّل أشخاص من أقربائهم و معارفهم يجيوا باش يتعشّاوا و يشربوا التّاي و يتحلّقوا في دار الميّت
و في هذا الصّدد آركول حكالنا طرفة على واحد شاف دار الناس خارجين داخلين عليها و يحكيوا على فطور جاء يهنّي فيهم ياخي طلعت دار ميّت و كلا طريحة
بعدها عدنا إلى السياسة مرّة أخرى و نجاح الأحزاب السياسيّة في رسم حدود وهميّة بين المواطنين ساهمت في تفرقتهم
بعدها قمنا مشينا للسونترال بارك
مانز و ليوماروس روّحوا و البقيّة خذينا شويّة ماكلة بغية سدّ الرّمق
حكينا مرّة أخرى على المجتمع و الهدف من التعبير عن الرأي و على صابر الرّباعي
كمّلت السندويتش متاعي آخر واحد كالعادة
خرجنا
العيدودي مشى في ثنيّة و البقيّة مشينا في ثنيّة
فلاّق قصّرلنا الثنيّة بالسيّارة آركول و العبد لله
بعدها شيّعت شويّة آركول في الحومة و قتله باش يحلّ حساب جديد على الفايسبوك و روّحت
بالطبيعة عندي انطباعات عامّة قديمة و متجدّدة على الأصدقاء اللّي جاوا
آركول طفل قلبه أبيض أما ما يحبّش العوج و يحتاج ساعات شكون يرجّعه لطبيعته الباهية
و ليوماروس عاقل و رصين و يسمع أكثر ماللّي يحكي عكسي بالضّبط
و العيدودي بوكشّان في الدّنيا عبد عقلاني و مخّه كبير يسمعك و يفهمك أما في الفضاء الافتراضي وحش ضاري بلا رحمة xD
و فلاّق اللّي هو مدوّن تقني و بعيد كلّ البعد عن السّياسة صوته ما يتسمعش جملة أما وين تجي حكاية تقنيّة الحديث معاه ياخذ أبعاد شيّقة جدّا
و مانز ما تسمعش صوته في لمّة فيها أكثر من 4 عباد أما يعرف شنوّة لازمه يقول وين الموقف يفرض نفسه
خلّي الملخّص هوني باش المدوّنة متاعي تحافظ على الطّابع المظلم متاعها =p
لووول، مرحبا بيك خويا عاطف ، و شكرا جزيلا على النقل الحي للقاء الأحباء ( إلي ما نعرف فيهم كان إنت و آركول شوية :) ) أما باش تخلص الكراء ؛)
RépondreSupprimerتلاحظ إنو فعلا هاكا حديث الساعة، و ما تنجمش ما تخوضش فيه مهما كانت معرفتك سطحية ( أو عميقة :) ) ، الفايدة نتعلمو آداب الحوار و نسمعو بعضنا و ما يكونش مجرد لغو، بل لازم نخرجو منو بفايدة على القليلة، خاطر بش نتحاسبو على كل حرف و كل دقيقة ..
ربي يدوم عشرتكم و ربي ينفع بينا و بيكم ديننا و أمّتنا :) و بارك الله فيك على مشاركة تجربتك و على ثقتك ، و مرحبا بيك في كل وقت :) و السلام عليكم
و فيك بارك الله
RépondreSupprimerآمين
وخيّان و ربّي يستر
معناها باش تسامحني في الكراء =p
ياخذ بخاطرك و ربّي يباركلك
هاني عمري كامل نحكي أما النسبويّة قضات عليّا هذاكة علاش ما نجّمش نكتب برشة في مواضيع كيما هاذي نخيّر النّقاش فيها على الكتابة و الخطاب في اتّجاه واحد
تي الحاصل ربّي يسهّل
و عليكم السلام و رحمة الله
عندك أسلوب رائع كي تحكي بالدارجة :)
RépondreSupprimerصحة المحواسة وربي يفضلكم لبعضكم ويجمعكم في الخير.
السلام عليكم :)
نسيت ما سئلتكش علاش من الأول تحكي بالأنا ومن بعد دورتها أني ؟:p
RépondreSupprimerعند سؤال اخر هههه ... ميسالش ؟
RépondreSupprimerشنوا الكتاب إلي تطالع فيه ؟ (كان ما يقلقش بالطبيعة) لعل يعجبني العنوان :p
بارك الله فيك :)) اللهم آمين :)
RépondreSupprimerغلطة مطبعية، هاك ال "أنا"،
ملا دقة ملاحظة تبارك الله عليك :D
يمكن خاطرني استانست نكتب بالفصحى أكثر ؛)
هاو باش نبدلها :P
le livre que je suis en train de lire s'intitule : "Savoir dire Non", c'est un livre de psychologie en fait ( je suis fan de ce genre d'ouvrages ;) ) , , l'auteur Marie Haddou est psychologue clinicienne ..
pas trop tentant je pense, non ? :p
ههه صار طلعت غلطة ؟
RépondreSupprimerوتبدلها ؟ يا ناري الأنا معاش تقضي :/
D'accord pour le livre, j'avoue que je n'ai presque jamais lu un livre de psychologie, mais je pense que c'est un domaine à connaître, en tout cas pour moi car j'aime avoir une idée sur tout :p
Tentant ? euh ça dépend si c pour des nuls en psycho comme moi, peut être que ça m’intéresserai :)
موش حكاية ماعادش تقضي :P
RépondreSupprimerأما نحب نكتب كيف ما نتكلم بالضبط ؛)
الكتاب موجه للجميع راهو، و فهمو ساهل، أما يمكن يقلق شوية خاطر يطرح المسائل بطريقة علمية ( موش برشا ) و يناقش بعض المشاكل النفسية مع الحلول .. حاصيلو جرب و تفكرني (كان ما عجبكش ما تتفكرنيش :p)
شخصيا الكتب هاذم عاونوني برشا في فهم العباد ( و فهم روحي ساعات )، و كيفاش نتصرف معاهم من خلال الحركات و تقاسيم الوجه و طريقة الكلام ...أكيد موش ديما نجيبها صحيحة :) أما خير من بلاش :)
فبحيث شبيني ما خليتش تعليق؟ هههه
RépondreSupprimerعلى كل هاني زدت قريتها كايني نكتشف فيها أول مرة في 16 أكتوبر 2014 وعجبتني عللخر وضحكتني عللخر تبارك الله عليك ما أضمرك وما أحلاك
أضحك الله سنك
ذكريات لن تعود :')
يا حسرة
فبحيث ليت الشباب يعود يوما ههههه
الحمد لله كل وقت ووقتو وأحنا ما نحمدوش ربي هههه
أحبك في الله
<3
hhhhh
RépondreSupprimerjolie surprise ! :D
Merci ma chère <3 love you too <3
3 ans déjà .. ça me manque cette ambiance ... incha Allah on aura l'occasion de faire d'autres rencontres, nous trois ..ou deux ..